მოლი ბერკანი ენერგიული და ამბიციური გოგონაა, რომელიც არასდროს ერიდება საეჭვო თუ მეტად ჩახლართულ საქმეებში გარევას, რის გამოც მუშაობას კრიმინალურ ჟურნალში იწყებს და მალევე აღმოაჩენს, რომ მთავარი რედაქტორი საიდუმლო წყაროებიდან იღებს ინფორმაციას ყველაზე გასაიდუმლოებული სპეცოპერაციების შესახებ. ეს ყველაფერი მოლის ცხოვრებას წარმოუდგენელ თავგადასავლად აქცევს, რომელშიც უამრავი ბოროტი გმირი ჩნდება და თითოეული მათგანი საფრთხეს უქმნის ბერკანის ცხოვრებას.
მოლი დარწმუნდა, რომ ჩვენ გარშემო არიან ადამიანები, რომლებიც საკუთარი მიმზიდველობისა და გამჭრიახი გონების წყალობით, გახდნენ წარმატებულნი. კაცობრიობა მათ თაყვანს სცემს, თუმცა მხოლოდ ერთეულები ხედავენ იმ რეალურ სასტიკ სახეს, რომელსაც ისინი მეუღლეების, შვილებისა და ზოგადად, ქალთა მიმართ აჩენენ, მაგრამ ჩვენ გარშემო არიან ისეთი ,,სუსტი სქესის’’ წარმომადგენლებიც, რომლებსაც მიღებული დარტყმა არ აშინებთ და ისინი უშფოთველ ცხოვრებას, სამართლიანობისთვის ბრძოლას არჩევენ.
დიახ, არსებობენ ქალები, რომლებსაც ეშინიათ და არსებობენ ქალები, რომლებისაც უნდა გეშინოდეთ! ეს რომანი სწორედ მათ შესახებ მოგითხრობთ.
,,შიშთან მოთამაშე’’ - ტრილოგიის პირველი წიგნია. ეს კრიმინალური რომანი სავსეა უამრავი პასუხგაუცემელი კითხვით, ეჭვით, იმედგაცრუებით, ტკივილით, ვნებითა და ცოტაოდენი სიყვარულით, თუმცა ნურაფრის შეგეშინდებათ. თითოეული ჩვენგანი ხომ ისედაც ასეთ ყოველდღიურობაში ცხოვრობს?!
