ალბერტო მორავია მეოცე საუკუნის იტალიური ლიტერატურის უმნიშვნელოვანესი ავტორია, „კონფორმისტი“ კი - მისი მრავალი რომანიდან ყველაზე გახმაურებული. ეს არის წიგნი თავისუფლების შიშსა და ადამიანებზე, რომლებიც თავისუფლებას ვერ ეგუებიან.
რომანის მთავარი გმირი, მარჩელო, ერთი შეხედვით, ჩვეულებრივი ცხოვრებით ცხოვრობს. ყველაფერი აქვს, რაც სჭირდება, თუმცა პერსონაჟის ეს გარეგნული სრულყოფილება სინამდვილეში მოჩვენებითია. მარჩელო ნორმალურობის იდეითაა შეპყრობილი და ყველაფერს აკეთებს იმისთვის, რომ იმდროინდელ საზოგადოებრივ სტანდარტებს მოერგოს, მაშინაც კი, თუ ეს მას ფაშისტური რეჟიმის ინსტრუმენტად აქცევს.
მოვლენები მკვეთრად იცვლება, როდესაც ფაშისტური რეჟიმის ერთგულების დასამტკიცებლად მარჩელოს თავისი ანტიფაშისტი პროფესორის მოკვლას დაავალებენ. მალევე ვიგებთ, რომ მარჩელოს კონფორმიზმის მიღმა შიში და ბავშვობის ტრავმები იმალება და მის „ნორმალურ“ ცხოვრებაში ქაოსი დაისადგურებს; ქაოსი, რომელიც სრულიად ააშკარავებს როგორც მარჩელოს პიროვნებას, ისე ფაშიზმის სახეს.
1970 წელს ცნობილმა იტალიელმა რეჟისორმა, ბერნარდო ბერტოლუჩიმ, წიგნის მიხედვით ამავე სახელწოდების ფილმი გადაიღო, რომელიც დღემდე იტალიური კინემატოგრაფიის შედევრად მიიჩნევა.
 (1).png "Supported cards"){kind=icon}