ბრიტანელი მწერლის, ჟურნალისტისა და პუბლიცისტის ნაწარმოებები მხატვრულ ლიტერატურაში ტოტალიტარიზმის კრიტიკის კლასიკურ ნიმუშებად ითვლება.
დისტოპია „1984“ წინასწარმეტყველური რომანია, რომელიც შეგძრავს, გაგაოცებს, შეგაშინებს, ზოგჯერ თავზარს დაგცემს, ზოგჯერ გაგაცინებს, მაგრამ გულგრილს არავითარ შემთხვევაში არ დაგტოვებს. დიდი ძმა, რომელიც მუდამ გითვალთვალებს, ორმაგი სტანდარტები, ომის მოთავე მშვიდობის სამინისტრო, ყოველივე განსხვავებულის ამოსაშანთად მომართული აზრების პოლიცია, მასმედიის კონტროლი, იდეოლოგიის მიერ სასტიკად დამახინჯებული და შინაარსისგან დაცლილი ენა, ხელისუფალთა გამუდმებული სწრაფვა ისტორიის ხელახლა დაწერისკენ, პარტიის მესვეურთა ლოზუნგები, რეალობას თავდაყირა რომ აყენებს − განა ყოველივე ამას დღესაც არ ვხედავთ ლამის ყოველ ნაბიჯზე?
