ედიტ ნესბიტი ინგლისურენოვანი კლასიკური საბავშვო ლიტერატურის მარგალიტია, რომლის შემოქმედებასაც ჩვენს უახლოეს წარსულში გვერდს უვლიდა საბჭოთა ცენზურა. „განძის მაძიებლებში“ თავადაც მრავალშვილიან ოჯახში აღზრდილი მწერალი დახვეწილი იუმორით აღწერს ნაადრევად დაობლებული ექვსი და-ძმის ცხოვრებას. მკითხველი ბუნებრივად ხდება მათი ხალისიანი თავგადასავლების თანამონაწილე. ეს წიგნი ბავშვს ასწავლის: როგორ მოიხადოს ბოდიში, როცა შეცდომას უშვებს; როგორ ამოუდგეს მხარში ახლობლებს და როგორ იზრუნოს მათზე; როგორ გაატაროს თავისუფალი დრო შემოქმედებითად და მხიარულად; გაჭირვების მიუხედავად, როგორ უნდა შეინარჩუნოს ადამიანური სახე; რას ნიშნავს ნამდვილი, უანგარო, და-ძმური სიყვარული... ბავშვებისთვის ასეთი მრავალმხრივი და თბილი წიგნი იშვიათია, მისი წაკითხვა კი, უდიდესი სიამოვნებაა.
